Rev 15 | ATA | STEP | Eni emaisou mimii ne mukalu xe ieli mulai teitexi no loxotolo la, la emaisou sosovo vile tatila manina mo iouvilemo. Eni emaisi'a ta angelo muxatele tamei xe tu'utu'umaxu kaluxusou muxatele tamei. Xo anu la'ia masua manina noxou Lataua kaluxusou ane la ukalu.

a 15:3Mul 15:1; Lex 139:14, 145:17

b 15:4Lex 86:9; Iel 10:6-7

c 15:5Mul 38:21

d 15:81Ta 8:10‑11; 2A'a 5:13-14; Ais 6:4

Revelation of John 15

Ta Angelo Muxatele Tamei Mo Tu'utu'umaxu Muxatele Tamei

1 Eni emaisou mimii ne mukalu xe ieli mulai teitexi no loxotolo la, la emaisou sosovo vile tatila manina mo iouvilemo. Eni emaisi'a ta angelo muxatele tamei xe tu'utu'umaxu kaluxusou muxatele tamei. Xo anu la'ia masua manina noxou Lataua kaluxusou ane la ukalu. 2 Mo ieli mulai la emaisou mii vile loxo laxalasi toxoxa'a loxo luaki ilou navu kalumo. Mo emaisi'a ane'i ane miuaulixu mii vova ne mo no anu mii e mupuinu iou loxo anu ne xe no anu itiiti sou ualasou ne itutulu no anu luaki ne pa'umolu. Ane'i mino'u susapu noxou Lataua anu mulosi'a. 3 ^aLa ane'i milexenu lexe vile noxou Mosesi anu itema sou xaixai noxou Lataua mo lexe noxou Sipsip 'Olu. Lexe ne aloxo 'o,

“Lataua Tila xaviinu musuku misevile.
Nini nalavusou na'oxonu mimii ta tatila xe lailaixe manina.
Nini itema mulapu mo navikala maninasi.
Nini tatanaanu tuala noxi'a ta mitema no lia 'o ukalusi.
4 ^bNinisisi nexolu va'axu no anu 'ili'ilixo masumasua.
La sou 'ena'ei umomomo sou u'umene Tila mo u'itinu ualasine uasi?
Tuatuala no xalexalee lia ukalusi ne ine'e ipita la ilotu noxinesi.
Xo 'ili'ilixo mulapu noxine ne muxali manina.”
5 ^cMo eni emaisi'a milexe mukalu xe ieli mulai teitexi no loxotolo la, la emaisou taasou lalotu anu tani alelaxu noxou Lataua sou a'alo manina mukisi. 6 Mo ieli mulai la emaisi'a ta angelo muxatele ta tamei ne mitokolomo no anu lavalava kea. Lavalavai'a ne maenaxu misevile mo misakiinu utupoko vile mi'oxonu no anu xoulu la ulamilami miutupokoxu no lutune'i. Ane'i miuatu la miuatu ilou tu'utu'umaxu muxatele tamei ne. 7 Ane'i miuatu mukalu la vile noxi'a ta mii tami'a e mimauli ne muno'u latotope xoulu muxatele tamei la mulosi'a. Latotope muxatele tamei ne mu'ana'ana no anu la'ia masua manina noxou Lataua. Anu Lataua e umauli utotomu mo kaluxu uasi. 8 ^dXe ieli mulai la navu umuxu ilou lamanaxu Lataua mo xavi noxou mutaasou taasou lalotu noxou ne la umomomo sou evile u'unalai no anu taasou lalotu noxou ne uasi. Mulai muxali no mine ta angelo muxatele tamei mino'u latotope sou tu'utu'umaxu muxatele tamei noxou Lataua mukalu.